Casa Monteverde Subdivision sa GMA, Cavite, Sumailalim sa MECQ

Ang Casa Monteverde Subdivision, Barangay F. De Castro sa General Mariano Alvarez, Cavite ay sumailalim sa MECQ o Modified Enhanced Community Quarantine. Ito ay matapos makapagtala ng 3 magkakasabay na kaso ng COVID-19 sa nasabing barangay.

Ayon sa inilabas na impormasyon ng Pamahalaang Bayan ng General Mariano Alvarez, mananatili ang MECQ sa bayan hanggang Hulyo 5, 2020.

Sa ilalim ng MECQ, papayagang magbukas ang mga negosyo sa loob ng subdivision mula Lunes hanggang Sabado subalit quarantine pass holder lamang ang maaaring mamili dito.

Mananatili namang sarado ang Gate 2 sa pagitan ng Sunshine Homes at Gate 3 sa pagitan ng Rolling Hills.

Papayagan lamang lumabas ng subdivision kung araw ng pamimili sa ilalim ng barangay scheming (Lunes at Huwebes) maliban kung ikaw ay special pass holder o papasok sa trabaho.

Hindi papayagang makapasok sa loob ng subdivision ang mga non-residents maliban sa mga emergency na pangangailangan.

Ang mga essential deliveries lamang ang papayagang makapasok sa subdivision tulad ng pagkain, gamot at PPEs.

Ang lahat ng store personnel sa loob ng subdivision ay dapat na nakasuot ng face shield at face mask.

Ang mga talipapa at grocery stores ay dapat maglagay ng markings para sa physical distancing.

Mahigpit na ipatutupad ang stay at home policy (bawal ang tambay), curfew hours (8:00 pm – 4:30 am), pagsusuot ng face mask at social distancing.

Ayon sa lokal na pamahalaan, ang lahat ay kanilang ginagawa upang masigurado ang kaligtasan ng nakararami.

Mayroon nang 18 kabuuang kaso ng COVID-19 na naitala sa General Mariano Alvarez ngayong araw ng Lunes, Hunyo 22, 2020.

Other Stories

For more news and important updates about Cavite, please like Proud Caviteño Facebook page.