Call Center Agent Mula Indang, Nagpositibo sa COVID-19

Isang bagong kaso ng COVID-19 positive ang naitala sa bayan ng Indang ayon sa lokal na pamahalaan nitong Martes, Hunyo 30, 2020.

Ayon sa impormasyong inilabas ng bayan, ang pasyente ay isang call center agent sa Pasay City. “Isa po siyang 25 years old, Female na CALL CENTER AGENT sa isang BPO Company sa Lungsod ng Pasay kung saan dito din siya nagtitigil sa isang boarding house, siya po ay mula sa Brgy. Poblacion 2.” ayon sa kanilang Facebook page.

“Bilang bahagi ng medical requirements sa kanilang kumpanya sumailalim siya sa PCR Swab Test noong ika-25 ng Hunyo 2020. Isinagawa ang naturang test sa isang Private Testing Facility sa Manila.” ayon din sa pamahalaan.

Lumabas umano ang resulta ng pasyente sa isinagawang PCR Swab Test noong Hunyo 26, 2020. Nakuha naman ang resulta nito nitong Martes, Hunyo 30, 2020 kung saan lumabas na positibo sa COVID-19 ang pasyente.

Samantala, kasalukuyang asymptomatic ang pasyente o hindi nakakaranas ng anumang sintomas ng sakit at naka-home quarantine. 

Nagsasagawa na rin umano ang bayan ng mga kaululang hakbang gaya ng contact tracing upang maiwasan ang posibilidad na mas kumalat pa ang sakit. “Nagsagawa na po ng mga kaukulang protocol tulad ng contact tracing ang ating Rural Health Unit, katuwang ang ating Brgy. Captain at mga Officials sa nasabing barangay na mahigpit ang isinasagawang monitoring at pagbabantay upang maagapan ang naturang sitwasyon.” ayon sa kanila.

Pagtitiyak naman ng pamahalaang lokal na ginagawa nila ang lahat para sa kaligtasan ng mamamayan. “Umasa po kayo na ang ating Pamahalaang Bayan ay tinitiyak ang kaligtasan at kahandaan ng ating bayan sa gitna ng ating patuloy na laban sa banta na dala ng sakit na COVID19.” ayon sa pamahalaan.

“Muli po ang ating pakiusap na sumunod sa lahat ng umiiral na patakaran na ipinatutupad at mas paigtingin ang ibayong pag iingat higit lalo sa unti-unting pagbalik ng ilang aktibidad sa ating pamayanan na maaring magdulot ng panganib dulot ng sakit na COVID19.” pakiusap nila sa publiko.

 Sa kasalukuyan, mayroon nang 6 kabuuang bilang ng mga nagpositibo sa COVID-19 sa bayan ng Indang kung saan 4 dito ang gumaling na at 2 naman ang active cases.

Para sa talaan ng mga kaso ng COVID-19 sa bawat lungsod at bayan sa Cavite, bisitahin ang ating CAVITE COVID-19 TRACKER.

Other Stories

For more news and important updates about Cavite, please like Proud Caviteño Facebook page.