‘Sinisiraan na kami’ — Bong Go

Halalan na, mag-ingat sa mga fake news

Ang patuloy na pagpapakalat ng fake news laban sa akin ay hindi na bago lalo na’t papalapit na ang eleksyon. Nasa taumbayan na ang paghuhusga kung maniniwala sila sa mga naninira lamang.

Inihayag ito ni Senator Christopher “Bong” Go bilang babala sa publiko na huwag magpapabiktima sa mga fake news at mga maling impormasyon na itinutulak ng mga nais magsamantala sa kahinaan ngayon ng mga Filipino na nahaharap sa hamon ng kasalukuyang krisis.

Ayon kay Go, may mga grupo na tinatangkang magtanim ng galit at pagkakahati-hati sa bawat isa para maisulong ang kanilang political agenda at pansariling interes.

“Inaasahan ko na ‘yan ngayong papunta na tayo sa eleksyon. Walang katapusang kasinungalingan at pagpapakalat ng fake news na naman mula sa mga grupong walang ginawa kundi manira ng kapwa. Wala pong katotohanan lahat ’yan,” ani Go.

Kaya naman pinaalalahanan niya ang mga Filipino na manatiling mapagbantay at i-validate muna ang mga impormasyong kumakalat sa iba’t ibang communication channels upang hindi mabiktima ng mga black propaganda.

Sinabi ni Go na hindi na siya masosorpresa sa paglabas ng marami pang kasinungalingan sa mga darating na araw lalo’t estilo na ito ng maruming pulitika ng mga nais sirain ang mga nagawa ng gobyerno.

Muling idiniin ni Go na wala siyang interes tumakbong presidente sa darating na halalan kaya hindi dapat sinasayang ng ilang grupo ang kanilang oras sa pagwakwak sa kanya.

Ngunit tiniyak ng senador sa mga Filipino na sa kabila ng mga putik na ibinabato sa kanya at sa administrasyon ay nananatili silang nakapokus sa pagtupad sa mandatong maibangon ang bansa mula sa pandemya.

Source: Phil Star Ngayon