Lalaking natagpuan sa bakanteng lote, namatay umano sa pagkalunod

Sa inilabas na report ni Police Major Pete Malinao, MD Medico legal officer ng Police Regional­ Office-4A na sumuri sa bangkay ng biktima, “As­pyxia by Drowning” o pagkalunod ang ikinamatay ng biktima na hanggang sa kasalukuyan ay hindi pa rin nakikilala.

Sa naunang ulat, natagpuan ang bangkay ng biktima sa madamong ba­hagi sa may gilid ng Abaya Road sa Brgy. Toclong, Kawit dakong alas-4:20 ng hapon.

Sa imbestigasyon ni P/Sergeant Mark Anthony­ Dealca, may hawak ng kaso ng Kawit Police, ti­na­tayang nasa edad 25 hanggang 30-anyos ang biktima na may taas na 5’9, maputi ang balat maikli ang buhok at nakasuot ng mamahaling puting t-shirt, maong pants at puting sapatos.

Dahil sa pagkalunod ang sanhi ng kamatayan ng biktima, palaisipan kung paano siya pinatay dahil sa madamong bahagi siya natagpuan at walang katubigan o ilog sa lugar. May posibilidad na pinatay ang biktima sa ibang lugar saka itinapon sa masukal na lugar upang mailigaw ang imbestigas­yon ng pulisya sa krimen.

Kaugnay nito, bumuo na ng special investigation­ team ang pulisya na tinawag na “Abaya” upang magsagawa ng malali­mang imbestigasyon sa pagkakatagpo sa natu­rang Chinese looking na biktima sa Kawit.

Sinabi ni San Juan na may iba-ibang tasking ang mga miyembro ng naturang team.

“We are now investigating the identity of the Chinese-looking cadaver because there was no identification card or any other document when he was found in the area,” pahayag ni San Juan.

Sinabi ni San Juan na wala silang nakitang palatandaan ng tama ng baril, saksak, pasa o galos­ sa katawan ng biktima, at pinabulaanan nito ang unang ulat na nakagapos ang kamay at paa ng biktima nang matagpuan ng mga awto­ridad sa Abaya Road.

Pinag-aaralan din ang isang video na nagsasabing may iba pang patay na nakita sa lugar mali­ban sa nasabing Chinese looking na lalaki.

Sa kabila nito, iti­nanggi ni San Juan ang kuma­kalat sa social media na isang chop-chop na kata­wan ng isang babae ang nakita sa plastic bags, ilang metro lang ang layo sa natagpuang bangkay ng Chinese looking na biktima.

Cavite COVID-19 Tracker

Other Stories