Basura Palit Gamit at Iba pa sa Carmona

Kilala ang Bayan ng Carmona sa mga programang nagsusulong ng pangangalaga ng kalikasan at pananatili ng kaayusan at kalinisan sa kapaligiran.

Isa na rito ang “Basura Palit Gamit atbp.” na naglalayong mabawasan ang basura sa pamamagitan ng panghihikayat sa mga indibidwal na itabi ang kanilang recyclables na maaaring ipalit sa basic commodities, gamit eskwela, at pera. Ito ay nagsimula noong taong 2008 sa pamumuno ng dating punongbayan at ngayon ay congresswoman na si Dr. Dahlia A. Loyola.

Ang mga nais na lumahok sa programang ito ay binibigyan ng passbook na magsisilbing record o talaan ng mga transaksyon. Kapag ang indibidwal ay nakaipon na ng recyclable waste, maaari nang dalhin ang mga ito sa Central Material Recovery Facility (MRF) sa Carmona Ecology Center, Barangay Lantic. Ang bawat kilo ng recyclables ay may katumbas na kagamitan o cash incentive. Sa pamamagitan nito, nababawasan ang basura na itinatapon sa sanitary landfills.

Katuwang sa nasabing programa ang mga miyembro ng Samahan ng Nagkakaisang Kababaihan ng Carmona Inc. (SNKCI) na namamahala sa pagpapatakbo ng MRF. Gayundin, ang SNKCI ay gumagawa ng iba’t-ibang produkto na mula sa recyclable materials na nagbibigay kabuhayan sa mga kababaihan. Isa sa mga gawang produkto ng SNKCI ay ang mga eco-friendly bag na gawa sa patapong juice packaging at tarpaulins. Ang mga ito ay tinaguriang “Ecobag ni Mayor Loyola” na nagtataguyot ng paggamit ng ecobags sa halip na plastik.

Kaugnay ng mga nabanggit ang patuloy na panghihikayat ng Pamahalaang Bayan sa mga residente na maging responsableng mamamayan sa pagtatapon ng basura. Noong 2013, inilunsad ang “Ako Basurero Campaign” na naglalayong turuan ang mga mag-aaral tungkol sa wastong pagtatapon o segregation ng basura. Bahagi ng programa ay ang pagbisita ni Bnoy (official mascot) sa mga paaralan, pangangalap ng signature campaign, pamamahagi ng IEC materials at oath taking upang mahikayat ang mga kabataan na maging responsable sa kanilang mga basura.

Source and Photo courtesy by Municipality of Carmona, Cavite Facebook Page