Balut Vendor, Sinopresa ng Kanyang Suki Bago ang Father’s Day!

Si Tatay Raymond Malandras, residente ng Brgy. Wawa 3, Rosario, ay 8 taon ng nagbebenta ng balut sa kanilang lugar upang maitaguyod ang sariling pamilya. Gamit ang lumang bisikleta ay matiyagang nag-iikot si Tatay Raymond na marami ng suki dahil sa pagiging masayahin at mabait.

Ngunit hindi niya inaasahan na isa sa kaniyang suki ang magbibigay sa kanya ng sariling motorisklo at P10,000 halaga ng pera bilang surpresa. Alam ni Mike Evander, nagbigay tulong, ang pagod, hirap, at sakripisyo ni Tatay Raymond para sa kaniyang pamilya kaya’t hindi siya nag dalawang isip na kausapin ang isang kaibigang negosyante na si Renz Mateo upang makapagbigay tulong.

Isang Honda Wave Dash at P10,000 pinansyal na tulong para sa misis na nagda-dialysis ang nakuha ni Tatay Raymond mula sa mga mabubuting suki.

“Sana makatulong ang motor na yan sa kanyang paglalako ng balot at yang halagang 10k ay kahit papano ay makatulong sa kanyang asawang may sakit” mensahe ni Renz Marlon Mateo.

“Maraming-maraming salamat talaga sa suki kong si Mike Evander at naging tulay siya upang matulungan ako ni Sir Renz Marlon. Malaking tulong po ito sa aming pamilya”, emosyonal na pasasalamat ni Tatay Raymond sa mga nagbigay ng tulong sa kanilang pamilya.

Source and photos: Epipanio Delos Santos Avenue