Periodic medical exam sa driver license, inalis ng LTO

Kasunod na rin ito ng inilabas na direktiba ni LTO chief Jay Art Tugade na amiyendahan ang LTO Memorandum Circular 2021-2285 o ang Supplemental Implementing Rules and Regulations of Republic Act 10930.

Nabatid na sa ilalim ng nasabing memorandum, bukod sa regular na medical examination bilang requirement sa pagkakaroon ng bago o renewal ng driver’s license, obligado pa ring sumalang sa periodic medical exam (PME) ang mga driver na nabigyan ng lisensiya, na ang bisa ay nasa 5-taon at 10-taon.

Ito ang probisyong nais ipabago ni Tugade dahil wala naman anila itong silbi, batay na rin sa isinagawang pag-aaral, gayundin sa mga nakalap na datos at pagkonsulta sa mga eksperto.

“There’s no empirical data saying that the periodic medical examination could prevent road crashes,” paliwanag pa ng LTO chief.

Dahil naman sa pag-amiyendang ito, ang magiging bagong kalakaran na ngayon ay isang beses na lang ang mandatory medical examination at ito ay gagawin lang tuwing bago makakuha o makapag-renew ng driver’s license.

“For licenses who will be issued a 5-year validity driver’s license and 10-year validity driver’s license, the medical ­examination shall only be required sixty (60) days prior to or on the specified renewal date,” dagdag pa ni Tugade, sa kanyang memorandum.

Para naman sa mga Pilipinong may driver’s license na nagtatrabaho o nakatira sa ibang bansa, oobligahin ang pagsasalang sa kanila sa medical examination sa loob ng 30-araw mula nang dumating sa Pilipinas bago sila mapayagan na makapagmaneho.

Pahayag pa ni Tugade, “Kami sa LTO ay nani­niwala na ang hakbang na ito ay magdudulot ng bahagyang ginhawa sa publiko dahil bukod sa hindi na sila kailangang gumastos ng paulit-ulit para sa medical examinations, maiiwasan din ang dagdag-abala lalo na sa mga mahahalaga ang oras para sa trabaho. Nasa pagkukusa na lang ngayon ng bawat indibidwal kung nanaisin nilang sumalang sa medical ­examination.”

Cavite COVID-19 Tracker

Other Stories